აშშ-ის დამოუკიდებლობის 249-ე დღისადმი მიძღვნილ ღონისძიებაზე ელჩმა რობინ დანიგანმა დემოკრატიის მნიშვნელობაზე ისაუბრა და თანამედროვე გამოწვევები გაახმოვანა:
„დღესაც ბევრს უწევს დემოკრატიის დაცვისთვის ბრძოლა — პოლიტიკურ ოპონენტებს ემუქრებათ პატიმრობა, სამოქალაქო საზოგადოება სამიზნედ იქცა, განსხვავებული მოსაზრებების მქონე მოქალაქეები კი „რადიკალებად“ იწოდებიან“, — განაცხადა ელჩმა და ვიცე-პრეზიდენტის სიტყვები გაიმეორა: „ვერ მოიპოვებ დემოკრატიულ მანდატს შენი ოპონენტების ჩახშობით“.
დანიგანმა აღნიშნა, რომ ივლისის ბოლოს საქართველოს ტოვებს და 33-წლიანი დიპლომატიური კარიერით ემშვიდობება ქვეყანას. „თქვენ გაგვიღეთ გულები და სახლები. ჩემი გულის ნაწილი საქართველოში რჩება. არასდროს შევწყვეტ რწმენას ქვეყნის დემოკრატიული მომავლისადმი“, — აღნიშნა მან.
ღონისძიება 2 ივლისს გაიმართა თბილისში, აშშ-ის საელჩოს ტერიტორიაზე. პრემიერი ირაკლი კობახიძე მიღებას არ დაესწრო.
ეს იყო პირველი შემთხვევა, როცა საქართველოში აშშ-ის დამოუკიდებლობის დღე სტრატეგიული პარტნიორობის შეჩერების ფონზე აღინიშნა. პარტნიორობა 2024 წლის 30 ნოემბერს შეაჩერა აშშ-მა „აგენტების კანონის“ მიღებისა და საპროტესტო აქციების ძალადობრივი დაშლის შემდეგ.
ამ ფონზე, აშშ-მ სანქციები დაუწესა მმართველი პარტიის წარმომადგენლებს, პარლამენტარებს, ძალოვნებსა და კერძო პირებს — ჯამში 100-ზე მეტ ადამიანს.