ოპოზიცია სამოქმედო გეგმას დღეს 12:00 საათზე გამოაცხადებს.
„ნაციონალური მოძრაობის“ ერთ-ერთმა ლიდერმა ზაალ უდუმაშვილმა განაცხადა, რომ ოპოზიცია მოქმედების სულ სხვა რეჟიმსა და სულ სხვა ტალღაზე გადადის.
„ჩვენ პრაქტიკულად უარი ვთქვით ყველანაირ პროტესტზე ქუჩაში, ვიდრე არ დასრულდებოდა მოლაპარაკებები, ვინაიდან ვფიქრობდით, რომ კიდევ გამოინახებოდა საღი აზრი „ქართულ ოცნებაში“ და ჩვენ მივიდოდით გარკვეულ შეთანხმებამდე, მაგრამ ეს ასე არ მოხდა. ჩვენ გავაუქმეთ ყველა აქცია და მათ შორის უარი ვთქვით 20 მარტის აქციაზე, რომელიც იყო დაგეგმილი, მაგრამ ახლა ჩვენ გადავდივართ მოქმედების სულ სხვა რეჟიმსა და სულ სხვა ტალღაზე, ამიტომ ჩვენი გეგმის შესახებ, თუ რას ვაპირებთ უახლოეს მომავალში და როგორ გაგრძელდება ქვეყანაში პოლიტიკური პროცესები, 12:00 საათზე გამოვაცხადებთ რუსთაველზე“, – განაცხადა უდუმაშვილმა.
„ჩვენ გადავწყვიტეთ, დროში გაწელილი გეგმით წარვდგეთ საზოგადოების წინაშე და 12:00 საათზე ყველა პოლიტიკური პარტია, რომელიც ხედავს, რომ ეს ბრძოლა უკვე ეგზისტენციალური ხასიათისაა, გამოვაცხადებთ სამოქმედო გეგმას, თარიღებისა და რეგიონების მიხედვით“, -განაცხადა „ევროპული საქართველოს“ ერთ-ერთმა ლიდერმა გიგი უგულავამ.